Las candidaturas son obèrtas per l’apèl a projèctes cultural annal de l’Euroregion APC26
Las candidaturas son obèrtas per l’apèl a projèctes cultural annal de l’Euroregion APC26
Dempuèi çò diluns, l’edicion novèla de l’apèl a projèctes Cultura de l’Euroregion es dobèrta, amb una envolopa totala de 120 000 euros. Los actors culturals e las industrias creativas de las Illas Balearas, la Region Occitània e de Catalonha an fins al 3 de setembre de 2026 per presentar lors projèctes de cooperacion culturala.
L’Euroregion Pirenèus-Mediterranèa a publicat, aquel diluns 18 de mai, las basas de la setzena edicion de l’apèl a projèctes culturals APC.
Aquela iniciativa annala, fòrta de mai de 15 ans d’existéncia, s’es revelada èsser un esplech poderós per far conéisser lo patrimòni qu’unís los territòris de l’Euroregion, obrir de novèlas perspectivas e afortir lo teissut cultural euroregional. Al fil de las annadas, mai de 2,2 milions d’euros son estats distribuïts e près d’una centena de projèctes culturals eissits de l’ensemble del territòri son estats sostenguts. Aquela annada encara, l’objectiu es de sostenir totas las formas de cultura e de diversitat culturala, los actors culturals e las industrias creativas euroregionalas, de favorizar la creacion artistica e culturala, d’estimular la cooperacion entre los territòris e de promòure un teissut cultural euroregional dobèrt sul bacin mediterranèu, dins un esperit de solidaritat amb d’autres territòris.
Las candidaturas deuràn inclure de partenaris eissits de cadun dels 3 territòris membres de l’Euroregion. Lo finançament euroregional maximal acordat poirà cobrir fins a 60 % del budgèt total de cada projècte sostengut, dins lo limit de 20 000 € de subvencion per projècte.
Aquela annada, l’Euroregion acordarà una prioritat als projèctes favorizant l’un dels aisses tematics seguents e integrant los caracteristics çai jos :
- Transicion de la cultura cap al mond numeric
- Utilizacion de la cultura coma esplech d’inclusion sociala
- Integracion de las valors dels Objectius de Desvolopament Duradís (ODD) e del Pacte verd europèu
- Escambis entre joves professionals a l’entorn de las lengas e culturas euroregionalas
- Activitats destinadas al desvolopament del jove public
- Promocion de l’egalitat de genre e de la diversitat afectiva, sexuala e de genre (LGBTI+) dins lo domeni cultural
Per tal de favorizar la participacion de novèlas estructuras, l’Euroregion a simplificat lo procediment de candidatura e met en plaça diferentas iniciativas per facilitar los contactes entre actors culturals dins l’encastre d’aquel apèl a projèctes e afortir lor visibilitat :
- Recèrca de partenàrias e carta dels actors culturals del territòri euroregional disponibles sus nòstre sit web : https://euroregio.eu/oc/cercaire-de-socis
- Comunautat WhatsApp permetent d’escambiar amb los responsables de l’apèl a projèctes e las estructuras culturalas dobèrtas a la cooperacion. Podètz accedir a la comunautat aicí.
D’un autre costat, un webinaire aurà luòc lo 28 de mai venent per tal de presentar l’apèl a projèctes mai en detalh, respondre a las questions e ofrir una plataforma favorizant la creacion de sinergias entre los actors culturals avent ja una idèa de projècte o recercant de partenaris per la concretizar.
L’apèl a projèctes culturals APC s’inscriu dins l’estrategia l’Euroregió 2030 qu’a per mira de bastir un avenidor solid e resilient. Aquela accion es finançada per la Direccion de las Relacions europèas e internacionalas de la Region Occitània, lo Departament de la Cultura de la Generalitat de Catalonha e lo Ministèri del Torisme, de la Cultura e dels Espòrts del Governament de las Illas Balearas.
Totas las informacions sus l’APC26 : https://euroregio.eu/oc/convocatoria-cultura-2026-2
