Lo 7 de novembre de 2024, l’Euroregion Pirenèus-Mediterranèa a celebrat son 20en anniversari al Palais de Pedralbes, a Barcelona.
De nombroses actors son estats presents, representants d’institucions europèas, de la societat civila e d’autras euroregions, aital coma los membres de nòstra Amassada euroregionala dels Joves.
Es eveniment es estat l’escasença de dreçar un bilanç de las accions menadas pendent doas darrièras decennias e de soscar a lor impacte suls tres territòris formant l’Euroregion.
Creada lo 29 d’octobre de 2004, l’Euroregion Pirenèus Mediterranèa es una organizacion de cooperacion politica entre lo Govèrn de la Generalitat de Catalonha, lo Govèrn de las Illas Balearas e la Region Occitània. Se transformèt en un Gropament Europèu de Cooperacion Territoriala (GECT) en 2009 e es doncas reconeguda dempuèi coma una institucion de cooperacion interregionala de nivèl europèu.
L’Euroregion Pirenèus Mediterranèa compta gaireben 15 milions d’abitants en 2019 (mai poblada que 19 dels 27 païses de l’Union europèa), sus un territòri de 110 000 km2 (mai granda que 16 d’entre eles).
Son PIB es de mai de 440 000 milions d’èuros (2019), es a dire l’equivalent d’Àustria.
Compta 700 000 estudiants, professors e cercaires, e mobilizèt 1 100 milions d’èuros de fonses europèus dins l’encastre del programa H2020 (fins 2019).
Territòri grandament innovador, a d’infrastructuras de recèrca europèa e internacionala de primièr òrdre, coma lo Centre europèu de ressorsas biologicas marinas, l’ESA, lo sincrotron Alba, lo super calculador MareNostrum, lo centre de coordinacion ITER, lo sistèma d’observacion de las còstas de las Illas Balearas…
L’Euroregion es un territòri amb mai de 35 espacis naturals terrèstres, marins e litorals e un malhum Natura2000 important, amb 30% de son territòri a las Illas Balearas, 25% en Catalonha e 18% en Occitània per çò qu’es de las zònas terrèstras.
Lo sèti de l’Euroregion es a Perpinhan, Region Occitània, França.
