Projet Smart Green Water

Programa: INTERREG SUDOE

Prioritat SUDOE:

Promòure la coesion sociala e l’equilibri territorial e demografic en Sud-oèst d’Euròpa per l’innovacion e la transformacion dels sectors productius.

Objectiu especific : Desvolopar las capacitats d’especializacion intelligenta, de transicion industriala e d’entreprenariat.

Budgèt total: 1 582 930 EUR

Finançament de l’UE: 1 187 197,50 EUR

 Cofinançament: cada partenari lo portarà en fons pròpri.

Durada: 2,5 ans

Promòure la coesion sociala e l’equilibri territorial e demografic en Euròpa del sud-oèst (SUDOE) per l’innovacion e la transformacion dels sectors productius.

L’objectiu principal de SMART GREEN WATER es de promòure de responsas comunas als desfises de l’agricultura dins l’espaci SUDOE, per la mesa en òbra d’estrategias d’especializacion intelligenta, per un sector agricòla mai duradís e intelligent qu’afortís lo teissut socioeconomic de las zònas ruralas. A aquel efièch, los partenaris trabalharàn amassa per engimbrar de solucions per accelerar la transicion numerica de l’agricultura cap a un sector agricòla mai resilient, adaptat a las problematicas climaticas, optimizat, amb una consomacion de las ressorsas en aiga mai sòbria. Lo projècte desvoloparà una estrategia transnacionala que favoriza lo desvolopament, la disponibilitat e la difusion de solucions numericas per crear las capacitats necessàrias demest los actors claus de la cadena de valor agricòla e de l’innovacion.

• Desvolopar las capacitats d’especializacion intelligenta, de transicion industriala e d’entreprenariat
• Desvolopar una estrategia transnacionala que favoriza lo desvolopament de solucions integradas (produches innovants, servicis) per respondre als besonhs d’una agricultura duradissa, intelligenta e numerica en aplicacion de las prioritats de las 3 regions
• Crear las capacitats necessàrias en çò dels actors claus de la cadena de valor per una agricultura duradissa, intelligenta e numerica

Lo desfís grand per l’agricultura del SUDOE es d’afrontar las consequéncias del cambiament climatic, sustot als episòdis de secada de mai en mai frequents. La disponibilitat de l’aiga doça contunha de demesir, tornant lo sector agricòla, fòrça dependent de las ressorsas en aiga, particularament vulnerabla. Necessita crear las condicions propícias a la resiliéncia de l’agricultura en melhorant l’utilizacion d’una ressorsa de mai en mai rara.

Per afrontar aquel desfís, la transformacion numerica de l’agricultura es essenciala. Per sostenir aquela transicion, los partenaris del projècte SMART GREEN WATER favorizaràn de responsas en metent en òbra d’estrategias d’especializacion intelligenta (S3) per un sector agricòla mai duradís e en aumentant las competéncias numericas del sector, afortissent atal lo teissut social. Los partenaris del projècte profecharàn, gràcias a la cooperacion transnacionala, d’una riquesa de situacions : tipologias de culturas e d’irrigacion, disponibilitat de l’aiga, organismes collectius de gestion de l’aiga… Las solucions, testadas per accions pilòtas, transportablas a diferents contèxtes, permetràn metre endavant los espleches melhors per respondre als besonhs dels agricultors. Las tecnologias innovantas d’optimizacion de l’irrigacion seràn assolidadas e difusadas gràcias a l’experimentacion en las regions partenàrias.

Enfin, los espleches numerics vendràn mai accessibles gràcias a un programa de formacion transnacional e una connexion entre las entrepresas innovantas e lo sector agricòla. L’estrategia transnacionala desvolopada e validada de mercé a las solucions esprovadas permetrà la connexion dels ecosistèmas d’innovacion, de las administracions publicas e del sector agricòla, l’utilizator final. Lo sosten a la numerizacion que ne resultarà garantirà un sector agricòla mai eficaç pr’amor de l’utilizacion de l’aiga e dels territòris rurals mai resistents als efièches del cambiament climatic.

• Una estrategia transnacionala de numerizacion de l’irrigacion serà bastida, basada sul diagnostic territorial de las regions implicadas
• Un metòde de caracterizacion serà realizat prenent en compte las foncionalitats de las solucions numericas d’irrigacion en foncion dels besonhs dels agricultors
• Las solucions numericas avaloradas seràn mesas a posita dels agricultors sus una plataforma transnacionala que lor permetrà de filtrar lor recèrca de solucions en foncion de lors besonhs
• Desplegament conjonch, pilòta e a l’escala transnacionala, de « bessons numerics » aplicats a la gestion de l’irrigacion e de la fertiirrigation.
• Las formacions (talhièrs tecnics e en linha) seràn promogudas conjuntament a destinacion dels agricultors, per respondre als besonhs especifics de cada region : reütilizacion de l’aiga pels agricultors franceses per exemple, e gestion collectiva de l’aiga en Espanha e a Portugal, per l’elaboracion de « Plans de contingéncia davant la secada »
• Metre en relacion las entrepresas tecnologicas amb los agricultors pendent forums d’innovacion e de jornadas de demostracion amb la tòca d’estimular l’ofèrta, la demanda e l’adaptacion als besonhs e a las solucions

Agricultors e entitats assimiladas, autoritats publicas nacionalas, regionalas e localas, agéncias sectorialas, organismes d’ensenhament superior e de recèrca, PME, organismes d’acompanhament de las entrepresas (cambras de comèrci…), grand public.

L’equipa de l’Euroregion, coma cap de projècte, coordina lo seguit e la gestion del projècte, aital coma las accions de comunicacion e de difusion.