La conferéncia « Gestion dels risques d’aigats subtes dins la region mediterranèa » s’es tenguda a Perpinhan lo 17 de junh de 2026, al Palais dels Reis de Malhòrca, amb l’objectiu de promòure un apròchi a l’encòp local e transnacionala per afrontar los risques d’inondacion dins los territòris mediterranèus. Organizat per l’Euroregion Pirenèus-Mediterranèa e lo consòrci del projècte LocAll4Flood dins l’encastre del programa Interreg Euro-MED, l’eveniment a amassat d’intervenents e dels representants de naut nivèl institucional e scientific per tal de partejar lors coneissenças e de far avançar de las solucions comunas de cap a l’un dels risques naturals mai grèus de la region.
L’obertura de la conferéncia es estada assegurada per Éric Cadoré, conselhièr regional e president de la comission de l’aiga e de la prevencion dels risques de la Region Occitània ; Sandra Ruiz Navarro, cap del departament de gestion del risc d’inondacion de l’Agéncia catalana de l’aiga (Generalitat de Catalonha) ; e Gerardo Torrente, secretari general de l’Agéncia de las aigas e de la qualitat environamentala de las Illas Balearas (ABAQUA, Governament de las Illas Balearas).
Lo programa de la conferéncia s’es articulat a l’entorn d’una jornada intensa, estructurada en quatre taulas redondas tematicas permetent d’abordar la gestion de las inondacions subtas dins una perspectiva globala. La jornada s’es acabada per una visita de terren al torrent de la Corregada, organizada pel Sindicat del bacin de la Têt, per tal d’observar sus plaça las accions començadas per protegir l’aglomeracion de Perpinhan contra los aigats subtes.
Meritxell Abril, cap de projècte al Centre tecnologic BETA, a presentat una sintèsi del projècte LocAll4Flood, de las accions menadas e dels objectius atenches dempuèi son lançament en genièr de 2024. La primièra taula redonda, consacrada al governament, a explorat los mejans de far trabalhar amassa los actors pertinents, amb la participacion d’expèrts de Bulgaria e de França. L’intervencion de Ganka Georgieva, adjoncha al cònsol màger de la municipalitat de Dalgopol, a sustot mes en lum la participacion de sa comuna al projècte. La segonda taula redonda a portat suls sistèmas d’alèrta precòça, en analisant coma fornir a las autoritats las donadas necessàrias a una responsa eficaça, aital coma en presentant lo sistèma Argos desvolopat sus nòu sits pilòts del bacin mediterranèu dins l’encastre del programa. Aquela session a amassat d’intervenents e dels retorns d’experiéncia de Catalonha e de Malta..
L’aprèp-miègjorn, la tresena taula redonda a mes en evidéncia l’importància de la sensibilizacion ciutadana e dels mecanismes permetent d’ajudar la populacion a comprene e a anticipar lo risc d’inondacion. Los participants an egalament presentat los materials pedagogics elaborats dins diferentas lengas e difusats al près de las administracions publicas, dels establiments escolars e d’autras estructuras claus per tal de los transmetre a la societat civila. La quatrena e darrièra taula redonda es estada consacrada a las solucions fondadas sus la natura, en metent endavant lo ròtle de las infrastructuras verdas coma esplech de reduccion del risc d’inondacion. Aqueles apròchis son estats illustrats pel catalòg de solucions fondadas sus la natura elaborat pel projècte, amb las contribucions de scientificas e de tecnicians de Grècia, d’Espanha e de Bòsnia e Ercegovina.
La conferéncia a egalament inclús una presentacion del programa Interreg Euro-MED coma quadre de cooperacion per la reduccion dels risques en Mediterranèa, assegurada per Curzio Cervelli, coordinator del Secretariat conjonch. Una session consacrada als autres quadres mediterranèus de gestion dels risques a amassat Octavi Quintana, director de PREMIÈT, aital coma Laurent Alfonso, expèrt en proteccion civila al près de l’Union per la Mediterranèa. La barradura de la conferéncia es estada assegurada per Joan Lloret, cap de projècte de l’Euroregion Pirenèus-Mediterranèa, e Xavier Bernard Sans, secretari general de l’organizacion, qu’an presentat las perspectivas d’avenidor del projècte LocAll4Flood aital coma las etapas venentas del consòrci.
Al delà de las intervencions, la conferéncia a constituït un vertadièr espaci de debat e d’escambi favorizant la difusion dels resultats, la creacion de sinergias e de novèlas oportunitats de cooperacion, aital coma lo transferiment de coneissenças entre administracions, equipas scientificas e professionals de la gestion del risc d’inondacion a l’escala euro-mediterranèa.
La conferéncia europèa « l’agricultura del carbòni en Mediterranèa » obrís de novèlas perspectivas per una agricultura duradissa de cap al cambiament climatic Lo projècte Carbon Farming MED a amassat [...]
