Los Grops d’accion locala rurals e de pesca de l’Euroregion unisson lors fòrças per promòure tres jorns de trabalh per tal de relevar los desfises comuns

Los Grops d’accion locala rurals e de pesca de l’Euroregion unisson lors fòrças per promòure tres jorns de trabalh per tal de relevar los desfises comuns

La ret euroregionala de desvolopament rural e de pesca s’amassarà del 26 al 28 de novembre pendent lo rencontre euroregional « Cooperar per transformar »

Aquel rencontre comprendrà la lectura, lo 27 de novembre, al Parlament de Catalonha, d’una declaracion comuna qu’a per mira d’assolidar la cooperacion mediterranèa e son posicionament dins l’Union Europèa

L’Associacion de las Iniciativas ruralas e maritimas de Catalonha (ARCA), l’Euroregion Pirenèus Méditerrannée, e lo Governament de la Generalitat de Catalonha organizan lo rencontre euroregional « Cooperér per Transformar », un espaci estrategic de reflexion e d’escambi d’experiéncias qu’a per mira d’afortir la cooperacion entre los Gropaments d’accion locala (GALP) rurals e de pesca dels tres territòris euroregionals dins lo domeni del desvolopament rural e maritim.

Aquel eveniment, que se tendrà del 26 al 28 de novembre a la torre Diagonal One de Barcelona, a per mira d’assolidar una vision mediterranèa partejada e a portar una votz comuna al près d’Euròpa. Aquela cooperacion se concretizarà publicament lo 27 de novembre per la lectura d’una declaracion comuna al Parlament catalan, reafirmant l’engatjament dels tres territòris al benefici d’una accion coordinada e d’una votz mediterranèa fòrta al près d’Euròpa. D’un autre costat, lo rencontre veirà l’intervencion de representants institucionals de la Comission europèa, de l’Estat espanhòl, de la Generalitat de Catalunya, del governament de las Illas Balearas e de la Region Occitània.

Aquel rencontre a luòc dins un moment decisiu. Los sectors rural e de la pesca de l’Euroregion son confrontats a de desfises comuns : garantir la continuitat d’una produccion primària duradissa, afortir las pichonas e mejanas entrepresas agroalimentàrias, promòure las infrastructuras partejadas e los circuits corts, valorizar los produches locals, encoratjar lo retorn dels talents joves e lo lideratge femenin, melhorar la gestion duradissa dels bòsques e de la pesca, facilitar la mobilitat e l’accès a un lotjament abordable, e permetre la relèva, tant a la campanha qu’en mar. Los Gropaments d’Accion Locala rurals e de pesca s’emplegan activament a relevar aqueles desfises pel biais de projèctes d’innovacion, de cooperacion e de desvolopament territorial.

Dins aquel contèxt, « Cooperér per Transformar » ven un espaci de posicionament estrategic de cap a las orientacions budgetàrias de la Comission europèa pel periòde venent de programacion, susceptiblas de comprometre la continuitat de la metodologia Leader. Aquí perqué aquel eveniment a per mira d’afortir una posicion comuna per defendre Leader e FEAMPA, en reafirmant lo ròtle essencial de la cooperacion mediterranèa dins lo desvolopament economic, social e comunautari.

La metodologia Leader e lo posicionament de l’Euroregion

Los Grops d’Accion Locala s’apièjan sus la metodologia Leader, un modèl europèu reconegut que lausa lo lideratge local e la participacion de totes los actors del territòri. Agricultors, elevaires, pescaires, entrepresas, organismes socials, administracions e autras actors participan a l’identificacion dels besonhs e a la promocion de projèctes transformadors. De cap a las grèvas dificultats qu’encontra actualament lo sector de la pesca dins l’Euroregion Pirenèus-Mediterranèa, aquesta a mes en plaça un Grop de trabalh sus la pesca. Parallèlament, los tres territòris an promulgat una declaracion en defensa de la pesca e de las comunautats de pescaires en Mediterranèa, aital coma una letra adreçada a la presidenta de la Comission europèa, Ursula von der Leyen, per tal de li far part de lors preocupacions comunas e d’exigir de mesuras garantissent la continuitat e la durabilitat del sector.

Òrdre del jorn del rencontre euroregional « Cooperar per transformar

• Lo 26 de novembre, la reünion s’obrirà per una jornada consacrada al mond rural, amb de presentacions e dels debats suls sistèmas de cooperacion de las GAL : sosten a la produccion locala, ajuda agricòla, gestion forestièra, ecotorisme, servicis essencials, mobilitat e lotjament.
• Lo 27 de novembre serà consacrat a las experiéncias Leader, amb de visitas a Barberà de la Conca e Vilanova i la Geltrú. L’aprèp-miègjorn, un eveniment euroregional de defensa del programa Leader se tendrà al Parlament de Catalonha, amb la lectura d’un apèl conjonch de Catalonha, de las Illas Balearas e d’Occitània qu’a per mira de garantir los finançaments europèus al delà de 2027 e a afortir lo ligam entre territòri, ciutadanetat e desvolopament local.
• Lo 28 de novembre, Jornada de la Mediterranèa, las sessions portaràn sul domeni maritim : los enjòcs de la pesca, la consomacion de peis e lo ròtle dels GALP dins lo melhorament de las condicions de vida de las comunautats de pescaires. Aquela conferéncia s’inscriu egalament dins l’encastre del labèl « Catalonha, Region mondiala de la gastronomia 2025 » e beneficiarà del sosten de l’Union per la Mediterranèa.

Lo rencontre es obèrt als professionals del sector primari, a las administracions, als agents de desvolopament, als cercaires, als estudiants e a las entitats ligadas al desvolopament territorial. L’inscripcion es gratuita e se fa pel sit web oficial del rencontre.

Aquel eveniment ambiciona de s’impausar coma lo ponch de rencontre euroregional de referéncia pels espacis rurals e maritims, un luòc d’escambi d’experiéncias, de creacion d’alianças e de promocion d’una votz mediterranèa fòrta en Euròpa. La cooperacion entre Catalonha, las Illas Balearas e Occitània es uèi mai que jamai necessària per bastir un avenidor duradís, resilient e partejat per totes los territòris de l’Euroregion Pirenèus-Mediterranèa.

Trobaretz aicí totas las informacions pertocant la reünion euroregionala.

Obrir / Telecargar:

Nota de premsa (CAT)

Communiqué de presse (FR)