Rencontre Euroregional : Cooperar per transformar organizat per ARCA

L’Euroregion Pirenèus Mediterranèa, en collaboracion amb l‘Associacion de las iniciativas ruralas e maritimas (ARCA) e la Generalitat de Catalunya, organiza lo Rencontre euroregional « Cooperar per transformar », una iniciativa ligada a la Comission de l’environament e al Gropament de la pesca, qu’a per mira d’afortir la cooperacion entre los territòris rurals e maritims de nòstra zòna transfrontalièra.

Los 26, 27 e 28 de novembre de 2025, aquel rencontre constituïrà un espaci d’aprendissatge collectiu ont los grops d’accion locals (GAL e GALP) rurals e de pesca, los professionals del sector, las administracions localas, los actors del desvolopament e los estudiants poiràn partejar lors experiéncias e soscar a las politicas ruralas e maritimas. Los debats portaràn suls enjòcs territorials comuns, en particular sus l’Agenda rurala e l’Estrategia maritima de Catalonha, e encoratjaràn las proposicions innovantas e las metodologias participativas per un desvolopament duradís.

Aquel eveniment mira egalament a revalorizar la metodologia LEADER e lo trabalh dels GAL e de las GALP en Catalonha, en Espanha e en França, per abotir a un manifèst comun afortissent la cooperacion transfrontalièra e la continuitat del finançament europèu al delà de 2027. Cerca atal d’assolidar un sentiment d’apertenéncia a la comunautat LEADER e a promòure d’alianças estrategicas per l’avenidor de las zònas ruralas e costièras.

Lo rencontre benefícia de la participacion activa d’entitats e d’administracions ligadas al desvolopament territorial, rural e maritim, talas coma l’Associacion catalana de las municipalitats, la Representacion de la Comission europèa a Barcelona, la Diputació de Barcelona (Conselh provincial de Barcelona), Medcities, lo Plan estrategic metropolitan de Barcelona, lo Congrès cultural catalan, la Federacion nacionala dels pescaires e lo ministèri de l’Agricultura, de la Pesca e de l’Alimentacion, aital coma de sosten de rets internacionalas talas coma REDR, Leader França, ELARD, Europe Direct e la Ret espanhòla dels gropaments de pesca.

Aquel eveniment es inscrich al calendari oficial de la Jornada de la Mediterranèa, reafirmant atal l’engatjament de l’Euroregion al benefici de la cooperacion, del desvolopament duradís e de la promocion del patrimòni e del desvolopament dels territòris mediterranèus.