La 3na edicion del concors CREAOCCAT de l’Euroregion Pirenèus Mediterranèa s’es acabada sus una avaloracion plan positiva, tant per la qualitat que per la diversitat de las proposicions presentadas. En tot, 4 projèctes e proposicions portats per 12 creators de contengut son estats recebuts, totes caracterizats per d’idèas particularament interessantas e creativas, metent en evidéncia lo dinamisme e lo potencial del sector dels creators de contengut en lengas euroregionalas netas, a saber l’occitan e lo catalan.
Lo projècte Arrels Mediterrànies | Raïces Mediterranèas es estat designat laureat d’aquela tresena edicion. Lo grop ganhant beneficiarà d’una borsa de 12 000 € (4 000 € per creator o creatritz) per desvolopar lo projècte tot lo long de l’annada 2026, amb per objectiu de crear e de publicar conjonchament una video mesadièra sus las rets socialas, valorizant la diversitat culturala, lingüistica e patrimoniala de l’Euroregion Pirenèus Mediterranèa. Los primièrs contenguts començaràn d’èsser difusats a partir de genièr de 2026.
Aquela edicion del CREAOCCAT, dobèrta del 1èr de setembre al 31 d’octobre de 2025, s’es distinguida per un format renovelat favorizant la collaboracion euroregionala, aital coma per son adaptacion a un sector en plena aviada, lo de la creacion de contenguts numerics en lengas regionalas. Demest los critèris de participacion figuravan sustot l’obligacion de concórrer en grops de tres creators, un per territòri membre, aital coma la preséncia de creators catalanofòns e occitanofòns. Aquela formula a favorizat lo trabalh n’equipa, la creacion de ligams e de novèlas associacions entre los joves, aital coma los escambis lingüistics e culturals.
L’apèl a projèctes a egalament conegut un impacte plan significatiu sus las rets socialas, tant en tèrmes de difusion del concors que d’interès suscitat per l’utilizacion de l’occitan e del catalan coma lengas de creacion numerica. Lo CREAOCCAT s’es atal afirmat coma una bona practica per afortir la preséncia de las lengas euroregionalas dins l’environament numeric, contribuïssent a lor normalizacion e a lor visibilitat al près dels publics mai joves e sus de canals a fòrta portada.
Las tematicas abordadas pels projèctes presentats an portat sus la gastronomia euroregionala, lo patrimòni cultural e natural, las lengas occitana e catalana, aital coma la promocion de las activitats culturalas, socialas e de joventut del territòri.
Lo concors s’inscriu dins los objectius estrategics de l’Euroregion Pirenèus Mediterranèa dins lo domeni cultural, qu’òbra dempuèi 2021 al refortiment d’una identitat euroregionala fòrta, ancorada dins la riquesa culturala, lingüistica e patrimoniala comuna dels tres territòris membres : Catalonha, las Illas Balearas e la Region Occitània.
27/01/2026 Euròpa e Mediterranèa, Pesca “Xavier Bernard Sans, secretari general de l’Euroregion, a prepaus de las protèstas del sector de la pesca” Podètz consultar la novèla e escotar l’entreten aicí en catalan. 16/01/2026 Euròpa e Mediterranèa LocAll4Flood « A partir d’enquèstas [...]
