Projèctes subvencionats lo 2017

ARC NÒRD MEDITERRANEA

Lo projècte Arc Nòrd Mediterranèa a per tòca promòure la creacion musicala amb instruments tradicionals: bodegas-autbòis (sansonhas de la Montanha Negra, clarin del Bas Lengadòc) per la Region Occitània amb l’associacion Mar e Montanha; sacs de gemècs-taròta per Catalonha amb l’associacion Va de Vent; calaminas-flaviòl (Malhòrca, Islas Balearas) amb l’associacion Xeremiers de Sóller; zampogna-totarella (Calàbria), amb l’associacion Totarella Zampogne dal Pollino. Aquestes rescontres d’instruments tradicionals, excepcionals e unics, combinan aspèctes musicals e lingüistics a l’entorn de sièis lengas romanicas: occitan, catalan, calabrés, francés, espanhòl e italian.

Lo projècte recebèt una subvencion euroregionala de 25.409 € per un periòde de 24 meses.

Sabor de rumba: un patrimòni transfrontalièr

Lo projècte “Sabor de rumba: un patrimòni transfrontalièr” aviá per tòca modificar las representacions negativas de la rumba catalana. Aquò requerís metre en valor aquela estetica musicala que concernís tota la populacion de l’Euroregion Pirenèus-Mediterranèa. Per o far, lo projècte aviá per tòca establir e gerir una ret transfrontalièra de sòcis, mas tanben desvolopar d’accions de formacion, difusion e produccion de coneissença en favor de la rumba dins tot lo territòri euroregional. Lo projècte amassava las seguentas entitats: KaRu Prod, l’Escola de Musica Moderna de Girona, Foment de Rumba Catalana e l’Associacion Manangelment Musical.

Recebèt una subvencion euroregionala de 27.500 € per un periòde de 12 meses.

Pirenèus-Mediterranèa Modèrn

Lo projècte “Pirenèus-Mediterranèa Modèrn” rebat la volontat de transcendir las frontièras amb la musica contemporanèa e las nòvas creacions. Rejonch l’associacion Música Actual de Catalunya, lo Festival Turbuléncias Sonòras de Montpelhièr e l’associacion culturala Placa Base de Malhòrca. Aquel consòrci aviá per tòca promòure la mobilitat e los escambis dinamics entre los actors musicals que participan al projècte. Lo programa comprenguèt de conferéncias e de concèrts organizats a l’entorn de tres eveniments que se debanèron a Barcelona, Montpelhièr e Malhòrca entre los meses de març e decembre de 2018.

Lo projècte recep una subvencion euroregionala de 24.120 € per un periòde de 12 meses.