Joenessa

La joenessa qu’ei lo motor de l’aviéner de l’Euroregion Pirenèus Mediterranèa e, entad aquera rason, qu’ei indispensable d’escotar las soas preocupacions e de’us integrar dens la concepcion de las politicas euroregionaus. La soa participacion qu’ei encoratjada de faiçon transversau dens maines estrategics taus com la cultura, l’espòrt, l’educacion environamentau, la formacion ligada au torisme e la promocion deus talents joens.

Dens aqueth contèxte, l’Euroregion qu’ahorteish lo son sostien a l’Amassada Euroregionau de la Joenessa (AEJ), creada en 2023, qui entamena aquera annada lo son dusau mandat e que s’esfòrça d’ahortir la soa coordinacion dab autas platafòrmas europèas. L’objectiu qu’ei d’amplificar la projeccion de la votz deus joens e d’acréisher la lor capacitat d’influéncia au nivèu europèu.

Los joens que son los protagonistas actius deu projècte euroregionau . L’Euroregion qu’òbra entà encoratjar la lor implicacion dens iniciativas comunas, lo lor accès a de navèras oportunitats d’emplec e d’entrepreneuriat, e la practica esportiva com atruna de cohesion, de benestar e d’inclusion sociau. Los escambis educatius, culturaus e esportius que contribuan a despassar las frontèras, a establir navèras complicitats e a ahortir lo sentiment de ciutadanetat europèa e euroregionau.

D’un aute costat, lo sostien a l’economia sociau e solidària, l’egalitat deus sèxes, l’interculturalitat e las valors europèas que vaden deus èishs fondamentaus entà bastir un territòri mei juste, duradís e participatiu. Atau, l’Euroregion que s’assolida com un espaci d’oportunitats e de projeccion entà las generacions navèras, en los plaçant au centre de la transformacion sociau e territoriau.