5au edicion de LET’S CLEAN UP EURÒPA de l’Euroregion

5au edicion de LET’S CLEAN UP EURÒPA de l’Euroregion : L’amassatge simultanèu de dèishas suus litoraus de Catalonha, de la Region d’Occitània e de las Balearas que hè lo son retorn aquera annada

Aquera annada qu’aurà lòc la 5au edicion de LET’S CLEAN UP EURÒPA, un rendètz-vos annau d’amassatge simultanèu de las dèishas dens los espacis naturaus protegits, coordinat per l’Euroregion Pirenèus Mediterranèa suus sons tres territòris

Entà la cinquau annada consecutiva, l’Euroregion Pirenèus Mediterranèa qu’organiza, en collaboracion dab la Generalitat de Catalunya qu’a travèrs de l’Agéncia de las dèishas de Catalonha, la Comuna de Roses, lo Governament de las Islas Balearas e la Region Occitània, ua jornada de netejatge e de sensibilizacion a l’environament dens l’encastre de la campanha europèa Let’s Clean Up Europe (LCUE) dont l’objectiu principau ei de sensibilizar aus efèits de la pollucion e de promòver la reduccion de las dèishas. L’accion que consisteish en ua collècta simultanèa de dèishas dens tres espacis naturaus protegits deus lors territòris e qu’aurà lòc lo divés 3 octobre vienent . Que cau soslinhar la preséncia de M. Marc Vilahur, de M. Ponç Feliu, de dauna Aina Torres e de dauna Bàrbara Xamena au demiei de las autoritats confirmadas aqueth dia.

Après l’escaduda de las edicions precedentas, aquera jornada qu’amassarà près de 200 escolans d’escòlas de las Islas Balearas, de Catalonha e de la Region Occitània, qui’s mobilizaràn entà agir amassa dens la luta contra la pollucion. L’objectiu n’ei pas solament d’amassar las dèishas, mes tanben de sensibilizar aus lors efèits e de promòver costumas de consomacion duradissas.

Los lòcs on se debanaràn las collèctas que son lo Parc Naturau deu Cap de Creus (Girona, Catalonha) dab la participacion deu Centre Escolar Empordà, lo Parc Naturau de Mondragó (Malhòrca, Iles Balearas) dab lo CEIP Santa Maria del Mar, e lo Site de l’Etang de l’Aur (Erau, Region Occitània) dab las escòlas Philippe Lamour e l’Etang d’Aur. Au delà de la collècta de dèishas, l’iniciativa que compren talhèrs qui a per mira d’ahortir l’impacte pedagogic e environamentau de l’accion dab la collaboracion de l’enterpresa Plastic at Sea e l’Universitat de Barcelona deu projècte transfrontalèr TRAP. Puish, ua reünion virtuau que serà organizada entà analisar e har lo bilanç de las dèishas collectadas dab escambis de bonas practicas enter las classas entà encoratjar la collaboracion au delà de las frontèras.

Com pendent las edicions precedentas, aquera accion que simboliza l’union deus joens de diferents territòris a l’entorn d’ua causa comuna, ahortint atau la cooperacion e la responsabilitat environamentau, pr’amor que maugrat la distància geografica, los escolans que partatjan los medishs objectius e qu’ageishen amassa en favor de la natura .

L’Euroregion que considèra que l’implicacion deus ciutadans, e en particular deus joens, qu’ei essenciau entà bastir un aviéner mei duradís. Entad aquera rason, los membres de l’Assemblada Eurorégionala de la Joventut qu’acompanharàn los grops escolars entà contribuar a la collècta de las dèishas.

Dab aquera cinquau edicion de LCUE, l’Euroregion que reafirma lo son engatjament en favor de la proteccion e de la restauracion de l’environament naturau entà un aviéner resilient partatjat, a l’orizont 2030.

Obrir / Telecargar :

Nota de premsa (CAT) (ES)

Communiqué de presse (FR)