Lançament de l’aperet a candidatura AMIC Gastronomia

L’AMIC Gastronomia que promòu la cooperacion gastronomica e educativa enter Catalonha, las Islas Balearas e Occitània

Nouvel aperet a candidaturas euroregionau entà promòver los escambis educatius e professionaus dens los sectors de l’ostaleria, de la restauracion e de la gastronomia, dab un budget de 45 000 €

L’Euroregion Pirenèus Mediterranèa que lança l’aperet a candidaturas AMI Gastronomie : Goute a la cooperacion, entà encoratjar los escambis enter las escòlas d’ostaleria, de restauracion e de gastronomia deus tres territòris. L’aperet a candidaturas qu’ei obèrt deu 15 de seteme au 10 de noveme de 2025 .

Aqueth aperet a projèctes que s’inscriu dens l’encastre de la presidéncia baleara de l’Euroregion (2025-2027), qui plaça lo torisme responsable, duradís e de qualitat au còr de la soa estrategia. Lo son objectiu qu’ei de promòver l’escambi de coneishenças e la mobilitat enter los aprendís entà favorizar la formacion dens lo maine deu torisme e los talents joens, e d’ahortir los ligams culturaus e professionaus enter Catalonha, las Islas Balearas e Occitània, en auherint de las experiéncias gastronomicas unicas qui miralhan la riquessa e la diversitat deu territòri euroregionau.

Lo projècte que s’adreça a las escòlas publicas o privadas d’ostaleria, de restauracion e de gastronomia qui deuràn préner un triple engatjament : organizar un eveniment suu lor pròpi territòri, arcuélher escolans e/o deus professors d’autas regions e, fin finau, enviar estudiants dens autes territòris de l’Euroregion. Gràcias a ua dotacion de 15 000 € per territòri, un budget totau de 45 000€, que serà possible de finançar las despensas de viatge e de sejorn, la logistica e l’organizacion d’eveniments, las ressorsas pedagogicas e las accions de comunicacion.

L’AMIC Gastronomia que representa ua escadença unica de méter en relacion joens talents, d’estimular l’innovacion culinària e de promòver las destinacions de l’Euroregion per la cultura, l’educacion e la creativitat partatjada. Las activitats qui seràn promovudas que comprenen showcookings tematicas, deus talhèrs dab caps convidats, de las iniciativas de gastronomia circulara e duradissa, la recuperacion de tecnicas tradicionaus, de las tastas de produits locaus e de nombrosas autas proposicions innovantas qui seràn començadas enter genèr de 2026 e junh de 2027.

Las candidaturas que deven estar sosmetudas per la platafòrma WIIN abans lo 10 de noveme de 2025 a 12 h.

Totas las informacions que son disponiblas suu site web de l’Euroregion.

Obrir / Telecargar :

Nota de prensa (CAT) (ES)

Communiqué de presse (FR)