La catorzena edicion de l’apèl a projèctes Cultura de l’Euroregion es ja dobèrta, representant un montant total de 120.000 €. Los actors culturals an fins al mes de setembre per far arribar lors projèctes de cooperacion entre los tres territòris membres : Catalonha, las Illas Balearas e la Region Occitània.
Los sèt projèctes de l’edicion 2023 #APC23 an ja aviat e contribuïsson a l’objectiu de l’organisme d’èsser un territòri resilient e duradís, plaçant sos ciutadans al còr de son accion.
#APC24 – Apèl dobèrt fins al 3 de setembre de 2024
L’Euroregion Pirenèus-Mediterranèa a publicat aquel divendres 31 de mai las basas de son catorzen apèl a projèctes cultura. I son eligibles totas las disciplinas e expressions artisticas dels sectors de la cultura e de l’art. Lo finançament de l’apèl a projèctes Cultura 2024 (APC24) de l’EPM, que s’auça a 120.000 €, emana de las participacions de sos 3 membres : lo Governament de las Illas Balearas, la Region Occitània e la Generalitat de Catalonha, que n’assumís actualament la presidéncia viradissa.
Los projèctes desvolopats dins l’encastre d’aquel apèl deuràn inclure de partenaris eissits de cadun dels 3 territòris membres de l’Euroregion, e lo finançament euroregional maximal autrejat se montarà a 60 % del budgèt total de cada projècte sostengut, dins lo limit de 20.000 € maximum per projècte.
Lo webinari de presentacion d’aquel #APC24 aurà luòc lo 13/06/24 al matin, en preséncia dels partenaris institucionals. Inclurà un temps de questions-responsas, aital coma de presentacion de projèctes a la recèrca de possibles partenaris per aquel apèl. Sus las rets, pòdon tanben èsser identificats gràcias a l’etiqueta #EPMpartners. Inscripcion sus aquel ligam : https://forms.gle/Bg5CDPUeazccZDwXA.
Segon los objectius mencionats dins son fuèlh de rota 2021-2030, qu’a per mira de bastir un futur resilient d’aicí a 2030, l’Euroregion desira promòure la diversitat culturala e lingüistica euroregionala e l’accès universal a la cultura, e balharà prioritat dins aquel apèl a projèctes cultura 2024 als projèctes sostenent la transicion de la cultura cap al mond numeric / numerizacion, l’utilizacion de la cultura coma esplech d’inclusion sociala, l’inclusion de las valors dels Objectius de Desvolopament Duradís (ODS) e del Pacte Vert Europèu, la practica e los escambis entre joves professionals a l’entorn de las lengas e culturas euroregionalas, e las activitats destinadas al desvolopament del public jove.
Reglament e informacion sus l’apèl a projèctes, dobèrt fins al 3 de setembre de 2024 : https://euroregio.eu/oc/convocacions-euroregionalas/ajudas-e-subvencions#convocatories-obertes
#APC23 – Projèctes en cors
Per metre en valor la diversitat culturala, lingüistica, e patrimoniala de son territòri, e coma espaci de referéncia al plan europèu e mediterranèu en matèria de cooperacion dins lo domeni de la creacion artistica jos totas sas formas, l’Euroregion sosten cinc projèctes eissits de son apèl 2023 :
_Restitucions mediterranèas es un projècte menat per l’Associació Cultural Ayamola (Catalonha), amb l’Association Digijeunes (Occitània) e lo Centre Cultural Casa Planas (Illas Balearas). Subvencion euroregionala : 19.373,24 €. Objectiu : recèrca e co-creacion d’òbras a l’entorn del concèpte de CRA (Creative Reuse Artwork).
_CIDAP II – Centre internacional de desvolopament audiovisual del Pedraforca : menat per Efímero Films (Catalonha), amb Cinètica Produccions (Illas Balearas) e Marianne Neplaz (Occitània). Subvencion euroregionala : 20.071,70 €. Laboratòri-plantolièra annal per de projèctes audiovisuals en primièra fasa de desvolopament, amb de contenguts basats sus la cultura euroregionala e a vocacion internacionala.
_REC II – Ret euroregionala de creacion : menat per Xarxaprod (Catalonha), amb Casa Planas (Illas Balearas) e Air de Midi (Occitània). Subvencion euroregionala : 20.141 €. Objectiu : crear de sinergias entre rets de centres de creacion e de produccion contemporanèa per promòure de projèctes ligats a la recèrca artistica e a l’experimentacion, en partejant ressorsas e coneissenças per tal d’assolidar lo sector.
_Calç entre regions : menat per 3C – Calce Culture Contemporaine (Occitània), amb Es Far Cultural (Illas Balearas) e l’Associació d’Amics del Centre d’Art Contemporani i Sostenibilitat El Forn de la calç (Catalonha). Subvencion euroregionala : 18.232,04 €. Recèrca e creacion artistica que amassa tres centres d’art contemporanèu de l’Euroregion, e se concentra sul lengatge geologic e los usatges de la cauç sus aqueles tres territòris, en tèrmes agricòlas, arquitecturals e artistics.
_ RCMPM3 – Ret de Creacion Musicala Pireneus-Mediterranèa : menat per l’Association Flashback 66 (Occitània), amb lo Studio éOle (Occitània), la Maison des Arts Sonores (Occitània), Mixtur (Catalonha), l’Associació Ensemble Espai Sonor (Illas Balearas) e l’Associació Amics del Jazz de la Ribera d’Ebre (Catalonha). Subvencion euroregionala : 20.141,00 €. Objectiu : desvolopar e sostenir una ret de creacion musicala sul territòri euroregional, anant d’Occitània fins al sud de Catalonha e las Illas Balearas.
_Ressona : projècte de co-creacion menat per Es Far Cultural (Illas Balearas), amb l’Eixida (Catalonha), Edicions del Núvol (Catalonha) e Ràdio Arrels (Occitània). Subvencion euroregionala : 19.830,25 €. Objectiu : encoratjar la cooperacion culturala per crear de contenguts radiofonics e podcasts en lenga catalana, que seguís las estrategias de jornalisme, de documentaris, d’archius sonòrs e que los aborda dins una perspectiva artistica e creativa. Projècte que favoriza la transicion de la cultura cap al mond numeric.
_Per acabar, lo projècte Contrastas, menat per Casa Planas (Illas Balearas), amb 3C – Calce Culture Contemporaine (Occitània) e Grisart Fotografia Sociedad Limitada (Catalonha). Subvencion euroregionala : 20.141,00 €. Objectiu : sostenir la creacion a l’entorn de las nocions de transit, de connexion territoriala, de transformacion istorica, d’identitat e de memòria collectiva a l’èra del numeric. Destinat al public jove.
Dobrir / Telecargar :
L’Eurorégion Pyrénées-Méditerranée est gestionnaire de l’une des cinq zones définies par le programme européen INTERREG POCTEFA, couvrant l’aire littorale méditerranéenne sur son territoire, de l’Aube à l’Ebre. Un appel à [...]
Aquel quatren rendètz-vos annal de collècta simultanèa dins los espacis naturals protegits, coordinat per l’Euroregion Pirenèus-Mediterranèa, a permés d’amassar 200 kg de degalhs en una ora. L’accion, que s’adreça a mai de 200 joves escolans de las Illas Balearas, de Catalonha e de la Region Occitània, a egalament permés d’explicar la varietat de las originas [...]
